O Concello de Ourense mellorará a mobilidade peonil na rúa Coenga, situada entre a Praza de San Cosme e a rúa Pena Trevinca, coa instalación dun ascensor que salve a forte pendente existente entre ambas as rúas, actualmente comunicadas a través dunhas escaleiras. O goberno municipal encargará a redacción do proxecto, para a súa posterior licitación e execución.
O Concello elaborara e licitara o ano pasado un proxecto que prevía a instalación nesta contorna dunhas escaleiras mecánicas que unisen os dous espazos. O proxecto quedou deserto. Agora revisarase a proposta anterior e mellorarase optando por un elemento vertical diferente, un ascensor no lugar das escaleiras mecánicas. Esta alternativa resulta máis económica e dotará dunha maior accesibilidade esta zona, pensando especialmente nas persoas con mobilidade reducida, que portan carriños de bebés ou da compra, amais de facilitar unha maior permeabilidade entre o centro histórico e a zona sur do barrio de San Francisco.