Así, entre os temas tratados, destacou a posibilidade de crear unha aldea modelo neste municipio e así poñer de exemplo de prevención e de desenvolvemento económico a un núcleo deste concello. Concretamente, falouse do núcleo de Pazos da Rabeda como posible candidato a este proxecto de recuperación de terras.
Así, o conselleiro salientou que estes instrumentos de mobilización de terras terán especial implantación tras a aprobación da futura Lei de recuperación da terra agraria de Galicia. Neste senso, o conselleiro sinalou que esta lei ten como principal obxectivo promover a recuperación da terra abandonada ou infrautilizada e darlle base territorial a quen a desexe traballar. Desta forma, preténdese revitalizar o rural e traballar así pola recuperación demográfica, pola mellora da calidade de vida da poboación e pola anticipación aos lumes forestais.
Deste xeito, o alcalde mostrouse moi interesado e comprometeuse a analizar a situación actual do núcleo de Pazos da Rabeda para comprobar que se axusta ás características deste tipo de proxectos de recuperación. Pola súa banda, o titular de Medio Rural agradeceu a súa disposición para traballar todos xuntos na protección do rural e incidiu en que, a través desta figura, ademais de executar a limpeza das chamadas franxas secundarias é determinante poñelas a producir para que actúen como devasa natural fronte aos lumes forestais.
Así mesmo, José González transmitiulle ao alcalde que, nas vindeiras semanas, técnicos da Consellería se desprazarían á zona para avaliar as posibilidades deste núcleo. Na xuntanza, que se desenvolveu de forma telemática, tamén estiveron presentes o director de Gandaría, Agricultura e Industrias Agroalimentarias, José Balseiros, e a directora xeral da Axencia Galega de Desenvolvemento Rural (Agader), Inés Santé.